احمد
في يوم كنت بتصفح الانترنت وشفت اعلان عن مسابقة كان اسمها رحلة تساؤل حسيت وقتها ان عندي فضول اشارك عشان اتعلم اجاوب علي اسئلتي وبالفعل اخدت القرار ومليت الاستمارة وجيت عند خانة ما هو سؤالك وحسيت بالحيرة اكتب ايه ؟ أنا عندي اسئلة كتير ياتري اكتب سؤالي اللي عن الفضاء ولا اكتب سؤالي عن دكتور العظام ولا اكتب ايه ؟كلهااسئلة بتدور في دماغي واخيرا اخترت سؤالي واللي عن الفضاء
تفتكروا سؤالي كان ايه ؟
سؤالي كان ازاي الصاروخ بينطلق للفضاء وايه وظيفة القمرالصناعي ؟
وفعلا كتبت السؤال ومرت الايام ولقيت المعلمة بتتصل وتقول اني اشتركت وإننا هنبدأ مع بعض رحلة شيقة نتعلم فيها ازاي نبحث عن اجابة سؤالنا ولقيت نفسي في جروب واتعرفت باصحاب جداد وشاركنا بعض الرحلة وبدأنا الرحلة
اجتمعنا كلنا علي برنامج الزووم عشان نتعرف علي المهمة المطلوبة وكنت اول مرة اعرف معني كلمة خريطة ذهنية بس الصراحة مكنتش فاهم قوي وحاسس ان الموضوع صعب عليا لكن قبلت التحدي
اوقات كتير حسيت بملل لكن اوقات اكتر حسيت بشغف وخصوصا لما كنا بنجتمع مع اصحابي ونتكلم سوا فعلا كنت بتحمس اني اكمل رحلتي واتعاون مع اصحابي واحاول اتعلم حاجة جديدة
بدأت اعرف يعني ايه مصادر ابحث فيها عن اجاباتي واني لا اعتمد علي مصدر واحد وبدأت ارجع اهتم بالكتاب ولقيت كتاب بيتكلم عن الفضاء بدأت أقرأ فيه وحقيقي استمعت لاني لقيت فيه معلومات كتير ولقيت فيه كمان أجابة عن سؤالي وكمان بحثت علي الانترنت وقابلني برنامج تليفزيوني بيتكلم عن انطلاق صاروخ في اليابان واستفدت منه فعلا وبدأت ادون خطواتي في الرحلة لحد ما قربنا للنهاية وعرفت الاجابة واتعلمت ازاي ابحث
وكانت الاجابة ان لابد من نقل رواد الفضاء و المعدات بصاروخ للوصول الي الفضاء ينطلق الصاروخ في الهواء ؛ و هذه عمليه تسمى (الاطلاق) لا بد من وصول سرعة الصاروخ الى اكثر من 11 كيلو متر في الثانية لمقاومة الجاذبية الأرضية بعض الصواريخ تضع اقمارا صناعيه في مدار حول الأرض يمكن للاقمار الصناعية ان تساعد في اعداد الخرائط و توصيل إرسال الهاتف المحمول و ارسال اشارات التليفزيون
ودلوقتي بعد ما وصلنا لنهاية رحلتنا واتعلمنا اننا نفضل ورا سؤالنا لحد ما نعرف اجابته ومش هبطل نسأل ولا هنوقف البحث والتعلم ونعيش كل يوم نتعلم جديد
انا حقيقي اشعر بالسعادة والي لقاء جديد في رحلة جديدة.
